حكايه اغنيه من اغاني الشايقيه

قصة اغنية : بحر المودة
وهذه واحدة من اجمل الاغنيات الشايقية عامة لانها فيها حنين للام وللبلد بصورة خيالية وفوق العادة وتقريبا كل سوداني حافظ لهذه الاغنية او جزء منها وملم بلحنها تماماً بالذات المغتربين الذينهم في مثل حالتنا هذه .
وهذه الاغنية كتبها الشاعر بعد تجربة حقيقة عاشها الشاعر شخصا فخلدت من ضمن الكلمات الخالدة في وجدان كل السودانيين
الى النص وبعده الى قصة الاغنية والكلمات ...




بحر المودة
كلمات الاستاذ / السر عثمان الطيب
الحان واداء الفنان/ محمد جبارة
===============================
شوفى الزمن يا يمة ساقنى بعيد خلاص
دردرنى
واتغربت
واتبهدلت يا يامة
ورينى الخلاص
ساقنى القدر منك بعيد
جرعنى كاس
يا يمه
يا فيض الحنان الما كمل
يا يمه
يا بدرى البشع دايماً يهل
يا يمه
يا نور الصباح وكتين يطل
واشرى يا (زينوبه) ولدك فى دروب الشوق كتل
محروم من الحب والمحنة
وراك همل

يا يمه
يا بحر المودة وكت يفيض
يا يمه
يا شعلة أمل زادت وميض
يا يمه
يا عنقود كلام منظوم قريض
يا يمه
يا نغماً حس بالشوق يرن وافكارى فيهو .. بيرتعن
دمعاتى شانو .. بينزلنواتذكرك يا يمه
فى الدغش النسايمو يهبهن
قايمى الصباح متكفلتى
شايلى الحليلى على المراح
والساعة ديك يادابو ديكنا بدا فى الصياح
والطير صغارو يغردن .جبتى اللبن بانشراح
واتذكرك يا يمه
ساعة الهجير صالاكى نار الدوكى
عُستيلنا الفطيررشيتى قلتى اكلوهو خير
واتذكرك يا يمه
يا بسمة الطفل الغرير وكت الخلوق ترقد تنوم
واسهر براى أرعى النجوم
والشوق يرف جنحيهو
بى فوق لى يحوم
هتف باسمك فى الخيال
طيفك كمان بي فوقى جال
واتمنى لو لحظات يدوم
لكنى فجأة القاهوو زال

واتذكرك يا يمه
ساعة الناس يجونا من البلد
ناعم ترابا على جسيماتن رقد
ريحة التمر فوق الهدوم
لون الخدار خانس لّبد
والشوق أوارو بيشتعل
كان ظنى فيهو يكون خمد
واتذكرك يا يمه والناس قالو قايمين البلد
رصو الهديمات ..عدلوا
ركبوا اللوارى وقبلوا
خلونى وحدى بلا أنيس
كيف انفرادى ..اتحملوا
شالوا السلام من عندى ليك وان شاء الله عندك يوصلوا

يا يمه
ساعة يوصلوا
ويقولوا ليك ..شفناه فى بلد الامان
مبسوط ورايق فى امان
أنبسطى يا نبع الحنلن
وانا حالى يشهدبو الزمان
يايمة رسلى لى عفوك ينجينى من جور الزمان..





برواية شاعر الاغنية الاستاذ السر عثمان الطيب في حلقة في تلفزيون السودان وحتى كان معاهو الفنان محمد جبارة وامو الكتب ليها الاغنية حاجة زينب ( زينوبة )..
اها قال الشاعر انو قبل سنين طويلة سافر من البلد قاصد الخرطوم عشان يشتغل فيها وطبعاً حنية قلب الوالدة عليهو قالت ليهو ما تسافر يا السر يا وليدي لكن اقنعا بانو لازم يسافر فوافقت على مضض .. المهم سافر السر للخرطوم وعاني ويلات الغربة عن الام والاهل وعاني من ظروف الحياة الصعبة والعمل الشاق وصورة امو اصلاً ما فارقت خيالو وطبعاً هو كان اصلاً زول فنان وشاعر عندو ملكة الشعر من الصغر ، قال مرة جاء واحد من البلد ونزل عندهم في البيت بتاع العزابة في السجانة ، السر سالو عن امو زينوبة الراجل قال ليهو والله تسلم عليك كتير السلام ومشتهية تشوفك وتسمع اخبارك ، زولك السر ما رهيف وقلبو حنين مو شايقي وبحب امو طوالي الدمعة فرت من عينو ومشى الاوضة بتاعتو وقعد يفكر في الوالدة وكتب الكلمات دي من صميم قلبو وهو بيبكي ..
بعد كم يوم كدي قام لاقى الفنان محمد جبارة لانو صديقو وحكى ليهو الحصل وشوقو للوالدة قام محمد جبارة قال ليهو ان شاء الله تكون كتبتها السر قال ليهو اي والله كتبتها في شكل جواب لامي ، محمد جبارة قال ليهو خلاص ادني ليها انا بلحنا واعملا اغنية ، السر ضحك وقال ليهو اغنية شنو ما اظنها تتلحن دي كلام ساي محمد جبارة قال ليهو ما عليك ادني ليها
المهم بعد الحاح محمد جبارة السر اداها ليهو وبعد كم يوم قابلو قام محمد جبارة قال ليهو تعال اقعد داير اسمعك اغنية وفعلاً غناها ليهو لاول مرة وتاني السر قعد يبكي لانو ما مصدق انو كلامو دا يبقى اغنية جميلة بال دي واللحن الحزين دا ودي كانت بداية انطلاق للتعامل بين محمد جبارة والشاعر السر عثمان الطيب
وكانت بحر المودة الاغنية الجميلة والحنينة .... وليتك تسافر كثيرا الاستاذ السر عثمان الطيب طالما تكتب مثل هذه الروائع....

منقول